ஊமை ராத்திரிகள்
- இராப் பொழுதில்தான் எல்லாம் நடக்கின்றன
- விமானங்கள் காணாமல் போவதும்
- மனிதர்கள் காணாமல் போவதும்
- இன்னும் பலவும்
- தோண்டி எடுக்கப்படும் எலும்புக் கூடுகள்
- உண்மையா சொல்லப் போகின்றன
- மீட்கப்படும் விமானத்தின் பாகங்கள் போல ஊமையாய்
- மனிதவுரிமைப் போராளிகள் போலவும்
- அரசியல் தலைவர்கள் போலவும்
- மௌனம் பெறுமதியான ஆடை
- பாதுகாப்பானதும் கூட
- மீண்டு வரும் வரலாறு
- எல்லாவற்றையும் சொல்வதில்லை
- மாட்டப்பட்ட கைவிலங்குகளையும்
- பெரும் பூட்டுகள் தொங்கும் சிறைக் கதவுகளையும்
- காணாமல் போன மனிதர்களையும்
- பதிவு செய்யப்பட்ட இறுதி அறிக்கைகளையும் கூட
- மீட்பர்களுக்கெல்லாம் தொன்டை அடைத்துக் கொள்ளும்
- நீண்ட பிரச்சாரங்கள் வலுவிழக்கும்
- தூக்கி விட்டுக் கொண்ட சட்டைக் கொலர்கள்
- கசங்கிப் போய் வேறு திசை நோக்கும்
- அப்போதும் கூட
- காணாமல் போன விமானங்கள் மீதான வாதம் முடிவு பெற்றிருக்காது.
- ஒன்றை அடைய இன்னொன்றை அழித்தல்
- கட்டில் கதவு மேசை கதிரைகளுக்காகச் சாவும் மரங்கள்
- நண்டுக் கூட்டினுள் அவிந்து போகும் கெழுத்தி மீன்கள்
- தூண்டில் நுனியில் குத்தப்படும் உலுவான் புழுக்கள்
- எல்லாவற்றினுள்ளும் அதே அரசியல்
- மீன் படவில்லையென்பதற்காக
- தூண்டில் இரை பத்திரப்படுத்தப்படுவதில்லைதானே,
- பூமிக்கடியில் மறைக்கப்படும் யுரேனியம் செறிவூட்டும் நிலையங்களையும்
- செவ்வாயில் நதிகள் ஓடி மறைந்த சுவடுகளில் திரியும் பூச்சிகளையும்
- முதல் வானின் சுவரைத் தொட்டுப்பார்க்க விடப்படும் விண்ணோடங்களையும்
- குறிபார்த்துச் சொன்ன விஞ்ஞானம் ஊமையாகிற்று
- உளவாளிகளுக்குக் கண் தெரியவில்லை
- செற்றலைட்டுகள் பார்வையிழந்திற்று
- அரச தலைவர்கள் சிரித்துக் கொள்வார்கள்
- கலங்கிய விழிகளோடு பத்திரிகைச் செய்திக்கான படம்
- அமைதியாக இருங்கள்
- இரண்டு சொட்டுக் கண்ணீருடன் ஒரு காட்சிப் பதிவு
- விருதுகள் அருகில் செல்லவே அச்சப்படும்
- இழுத்து வாருங்கள் விலங்கிடப்பட்ட மனிதர்களை
- தலைநிமிர்ந்து நிற்க அனுமதிக்காதீர்கள்
- உண்மைகளைச் சிறையிலடையுங்கள்
- முழுமையாக அவமானப்படுத்தி விட்டு அமைதி கொள்ளுங்கள்
- சத்தியத்திற்குத் தண்டனை கொடுங்கள்
- கொன்று புதைத்து விடுங்கள்
- முடியாதபட்சத்தில்
- நாக்கை அறுத்து
- கண்களைக் குருடாக்கி
- காதுகளைச் செவிடாக்கி
- விரல்களையும் வெட்டிவிட்டு
- விடுதலை செய்யுங்கள்
- சுதந்திரமாகத் திரியட்டும்
- எல்லா இடங்களிலும் எல்லைகள் கடந்து வாழும் நீதியும் சட்டமும்
- வெள்ளைக் கொடிகள் அசைந்து கொண்டே இருக்கும்
- ஏற்றப்பட்ட வெள்ளைக் கொடிகள் அசைந்துதானே ஆக வேண்டும்
- உலக அரசியலைப் புரிந்து கொள்ள
- பக்குவம் காணாது
- நிகழ்வுகளை விளங்கிக் கொள்ள
- புத்தியும் போதாது
- செய்தி இதுதானென்றால்
- தலையைத் தலையை ஆட்டிக் கொள்ள
- ஆட்களுக்கா பஞ்சம்
- இராப் பொழுதில்தான் எல்லாம் நடக்கின்றன
- விமானங்கள் காணாமல் போவதும்
- மனிதர்கள் காணாமல் போவதும்
- இன்னும் பலவும்
No comments:
Post a Comment